Во болницата во Гостивар почина пациентка позитивна на Ковид 19

Жена од село на подрачјето на Општина Врапчиште, кај која бил потврден коронавирус, вчера починала во општата болница во Гостивар. Позитивниот резултат од тестот, бил добиен половина час пред да настапи смртта. Пациентката била донесена во болницата во тешка состојба, поради што медицински екипи интервенирале со реанимација. Петнаесетина медицински лица се ставени во домашна самоизолација. Се работи за целата смена на лекари и сестри од Ургентниот центар, како и неколку лекари од други одделенија, кои биле повикани за интервенција.

Директорот на болницата Јакуп Јакупи рече дека се преземени сите мерки според протоколите, и дека застој во работата на установата нема да има.

„ Медицинскиот персонал е испратен во домашна самоизолација од 14 дена, а веднаш е извршена целосна дезинфекција на просториите. Застој во работата на одделенијата и службите нема, затоа што сме подготвени за вакви ситуации и го организираме персоналот на начин да нема пречки во функционирањето“, рече Јакупи.

Во денешната статистика на Министерството за здравство, овој случај не е евидентиран како смртен, најверојатно поради временската рамка на пријавување.

Инаку, до сега во регионот на Гостивар три лица починаа како последица на компликации од ковид 19.

error: Content is protected !!