Во болницата во Гостивар хоспитализирани се 54 ковид пациенти

Есенскиот бран кој резултира со зголемување на бројот на новозаразени со коронавирус во Гостивар ги полни болничките одделенија предвидени за третман на заболени со ковид. Актуелно на инфективното, интерното и одделението за неврологија кои се ковид центри, хоспитализирани се вкупно 54 пациенти. Слободни легла има, а капацитетите според потребата ќе се прошируваат, вели директорот на општината болница во Гостивар, Јакуп Јакупи.

„За сега болничките капацитети се стабилни, вкупно раполагаме со 83 легла, од кои 54 се исполнети. На интерно се хоспитализирани 24 пациенти, на инфективно 21 и 9 на неврологија. Сите се третираат по соодветните протоколи од Министерството за здравство и Комисијата за заразни болести. Болницата е снабдена со сите потребни лекови кои се во протоколите за лекување на ковид“, изјави директорот Јакупи.

За да нема застој во грижата за пациентите, реорганизација се прави и со здравствениот персонал, со оглед дека коронавирус се појавува и меѓу медицинарите.

„Се појавија повеќе случаи на заразени меѓу медицинскиот персонал. Но, се обидуваме, како што се потребите да го распределиме медицинскиот кадар, затоа што секој ден треба да реагираме адекватно и соодветно каде што има потреба. И со средно медицински персонал и со транспортери, за лекари да не зборуваме, затоа што треба да ги покриеме потребите на пациентите 24 часа.“, рече Јакупи.

Според последните податоци од Министерството за здравство, активно заразени со коронавирус на гостиварското подрачје се 982 лица. Бројот на починати како последица на компликации од почетокот на пандемијата, достигна 101.

error: Content is protected !!