Во Гостивар досега вкупно 50 тестирани за корона, нови позитивни нема

Брачен пар којшто се наоѓал во државен карантин во еден од хотелите во Маврово, бил пренесен во болницата во Гостивар, откако мажот добил симптоми на коронавирус. Директорот на болницата Јакуп Јакупи на состанокот на Кризниот штаб во Гостивар информираше дека на двете лица им се врши тестирање, а резултатите се очекуваат во текот на утрешниот ден.

Неделава во општата болница во Гостивар биле примени 7 пациенти со симптоми слични на Ковид 19, чии тестови излегле негативни на вирусот.

Кризниот штаб ја оцени состојбата на подрачјето како сериозна, но стабилна.

„Вкупно до сега тестирани се 50 лица и освен првиот случај во март, од кој веќе истекуваат 14 дена, нема други позитивни пациенти со корона. Препораките остануваат исти, граѓаните да не излегуваат надвор без потреба и да ги следат советите за заштита. Институциите продолжуваат да делуваат координирано во насока на спречување на ширење на вирусот“, изјави градоначалникот Таравари.

Надлежните апелираа здруженијата и организациите да се вклучат во организираната распределба на хуманитарната помош, за пакетите да стигнат до социјално загрозените на безбеден начин.

Powered by Live Score & Live Score App