Во Гостивар потврден е прв случај на заболен со коронавирус

Во Гостивар е регистрирано првото заболено лице со коронавирус. Станува збор за жена на возраст над 45 години, којашто пред десетина дена се вратила од Германија. Таа немала симптоми, но се јавила на инфективното одделение во гостиварската болница, затоа што лице од странска држава со кое била во контакт било позитивно на корона.

„Денес околу 12 часот од ХЕС Гостивар не известија дека тестот на пациентката на коронавирус е позитивен. Таа е изолирана и сместена на инфективното одделение во Гостивар. Нејзината состојба е стабилна, а во случај на потреба ќе се транспортира на инфективната клиника во Скопје.“, рече инфектологот Енес Мемеди.

Во меѓувреме направена е епидемиолошка анкета и ќе се преземат соодветни мерки за лицата коишто биле во контакт со заболената.

Директорот на општата болница Јакуп Јакупи по денешниот состанок на општинскиот Кризен штаб изјави дека како установа ги направиле сите подготовки за справување со состојбата со коронавирус. Заштитна опрема за медицинскиот персонал има, но заради вонредните услови и повеќе се троши, рече тој.

Инаку, откако беа воведени превентивните мерки против корона,  извршено е тестирање на вкупно 20 лица од Гостивар и гостиварско и резултатите за нив се негативни.

Powered by Live Score & Live Score App