Во градинките во Гостивар нема случаи на коронавирус, во училиштата 26 заразени

Во екот на пандемијата и секојдневните загрижувачки бројки на новозаразени со коронавирус, добрата вест за Гостивар доаѓа од детските градинки. Таму моментално нема позитивни случаи, ниту меѓу децата, ниту кај воспитувачки. За жал, не е така во гостиварските училишта, каде се регистрирани вкупно 20 заболени наставници и професори и 6 ученици. Од општинскиот Сектор за образование велат дека состојбата се следи, а при појава на позитивни случаи се преземаат соодветните мерки, како изолација, вонредна дезинфекција и слично.

„Во средните училишта 4 професори и 1 ученик се позитивни, додека во основните вирусот е потврден кај 16 наставници и 5 деца. Во градинките, иако на почетокот имаше неколку случаи, моментално нема ниту еден заболен. Во последно време гледаме дека во целата земја, не само во Гостивар се зголемува бројот на заразени. Ова е ризична ситуација, загрижувачки е за сите и секој треба да даде свој придонес во борбата против ковид, со почитување на мерките“, рече Аслијан Снопче, раководител на Сектор за образование Општина Гостивар.

Со оглед дека ширењето на вирусот периодов зема се поголем замав, а стартуваше и грејната сезона училиштата ја реорганизираат работата. За да се избегнат контакти, наставниците и професорите кои држат часови онлајн, работат од дома, наместо од училиштето, како што беше до сега.

Првото полугодие од оваа учебна година ќе заврши на 31 декември. Учениците ќе бидат на зимски распуст до 21 јануари 2021-ва. Од Министерството за образование за сега нема најави за измени во одвивањето на наставата. Децата од прво до трето одделение одат во училиштата, а останатите следат часови преку интернет.