Во Полог над 2.200 граѓани се во изолација со решение

Во полициските контроли на лицата во изолација на полошкото подрачје во последното деноноќие, не биле констатирани непочитувања. Според податоците од Секторот за внатрешни работи, моментално во Тетово вкупно 1.418 граѓани се со активни решенија за изолација поради позитивен ковид тест или контакт со заболен, додека во Гостивар таа бројка изнесува 786. Полицијата секојдневно врши контроли дали има прекршувања и упатува апел доследно да се почитуваат решенијата.

„Граѓаните позитивни на вирусот и оние кои имале близок контакт со заразен поради што добиле решение од Државниот здравствен и санитарен инспекторат, се должни да ја почитуваат изолацијата. Изминатиот период имавме случаи кога при контролите, лица со решенија не беа затекнати дома. На тој начин носат ризик да го шират вирусот. Апелираме на повисока свест за сите мерки за заштита од ковид“, нагласуваат од СВР.

Нови решенија за изолација во последните 24 часа им биле издадени на 159 лица во тетовско и 28 во гостиварско. Инаку, засилени се контролите околу носењето на заштитна опрема на лицето. Последното деноноќие во Тетово казнети се 68 граѓани, додека во Гостивар 81, поради неносење маски.

error: Content is protected !!