Во регион на Гостивар повеќе оздравени од новозаразени со ковид

Состојбата со ширењето на коронавирусот во регионот на Гостивар е потсмирена. Така барем покажува официјалната статистика на Министерството за здравство. За разлика од претходниот период, кога се бележеа и по 80-тина нови случаи дневно, неделава тој број се движи од 9 до 30.

Во извештаите на Инстутутот за јавно здравје се регистрираат повеќе оздравени, од новозаразени граѓани. Опаднат е и бројот на пациенти со ковид кои се хосиптализираат во гостиварската болница. Како што пренесуваат медицинските лица, проретчиле пациенти кои развиваат  тешки форми на болеста.

„Бројката на заболени опаѓа и тоа не‘ радува. За разлика од минатата недела кога беше страшно, со многу новозаразени и тешки случаи, оваа недела е стабилно. Моментално на одделенијата кај нас се лекуваат 58 пациенти со ковид“, рече директорот на општата болница, Јакуп Јакупи.

Лекарите сепак порачуваат граѓаните да ги почитуваат мерките за заштита, особено во празничниот период. Да се избегнуваат групирања и прославите да поминуваат во кругот на најтесното семејство, за да не дојде до нов силен корона бран.

Според податоци од здравствените власти во општините Гостивар, Врапчиште и М.Ростуше од почетокот на пандемијата вкупно биле потврдени 3.162 случаи на коронавирус. Во ковид евиденцијата за подрачјево, регистрирани се 132-ца починати и      2.291 оздравен пациент.

Во однос на симптомите кои се пријавени кај заболените лица, најчесто се регистрирани температура, малаксаност, кашлица како и ослабен осет за мирис и вкус.