Во сабота Меморијален марш во спомен на жртвите во несреќата кај Ласкарци

Во сабота, 13 февруари се навршуваат две години од трагичната автобуска несреќа близу Ласкарци, која го зави Гостивар во црно. Несреќата одзеде 16 човечки животи, а над 30 лица беа повредени. Во спомен на жртвите на датумот на страотниот настан, ќе се организира Меморијален марш. Настанот го организираат повеќе спортски клубови, под покровителство на гостиварската локална самоуправа. Тргнувањето со организиран превоз е од пред општската зграда во сабота во 10 часот. Маршот стартува од наплатната рампа Тетово, а ќе се закружи на градскиот плоштад во Гостивар.  

„Лани, маршутата од Ласкарци до Гостивар на растојание од околу 50 километри се покажа дека малку потешка, па затоа годинава ја скративме планираната патека, но без да губи од симболиката. Значи, маршот ќе треба да започне кај наплатна рампа Тетово и ќе заврши на градскиот плоштад во Гостивар со симболична церемонија со светлосни ефекти во спомен на 16-те жртви. Посебно внимание ќе посветиме на безбедноста, како во однос на движењето во сообраќајот, така и во смисла на заштита од Ковид-19, строго почитувајќи ги протоколите за јавни настани на отворен простор.“, појасни Замир Мустафаи, еден од иницијаторите.

На 13 февруари 2019-та година, автобусот на Дурмо Турс, кој тргнува кон Гостивар од скопската автобуска станица во 16 часот и 15 минути со 51 патник, излета од коловозот, ги проби банкините, падна и се преврте на стариот дел од патот.

Во несреќата животите ги загубија: Дејан Ристоски, Раметула Абдураими, Валдете Хамити, Јовица Трпевски, Бесим Фетаи, Онур Садику, Есат Емрули, Ајдин Исмаили, Бејза Узеири, Зоран Давидовски, Бобан Аврамовски, Трпана Јаневска, Павле Костоски, Арсе Арсоски, Ферди Касо и Ерза Османи.