Во страв од коронавирус гостиварци прават залихи од храна и гелови за дезинфекција

Меѓу граѓаните владее страв и паника од коронавирус. Вчера беше потврден првиот случај на заболен во Македонија, 50 годишна жена која престојувала во Италија. Надлежните повикаа на смиреност и препорачаа да се следат општите мерки на заштита. Но, граѓаните ги празнат рафтовите во маркетите, прават залихи на храна, а навалија и во аптеките по средства за дезинфекција. Фармацевтите во Гостивар потврдија дека побарувачката на гелови за дезинфицирање е толку зголемена, што не може да се постигне да се обезбеди за сите.

„Деновиве има многу голема побарувачка на средства за дезинфекција, но сметам дека непотребно се крева паника. Граѓаните доаѓаат и бараат да купат по 7-8 пакувања одеднаш, што не можат да ги искористат и така не останува за другите. Секое утро во аптеките има дотур на гелови, но многу брзо се трошат и се купуваат големи количини одеднаш. Навистина, не треба толку да се крева паника“, рече фармацевтот Алберт Селими.

Ако немаат средства за дезинфекција, граѓаните редовно и темелно да ги мијат рацете со антибактериски сапун, советуваат фармацевтите.

Здравствените власти дадоа препораки училиштата да ги одложат екскурзиите во подрачјата каде има коронавирус. Во општите мерки на заштита спаѓаат: избегнување на контакти со болни, покривање на носот и устата при кашлање и кивање, внимателност и голема хигиена при подготовка на храна и контакт со животни, со оглед дека вирусот може да се пренесе и преку нив. 

Инаку, инфективното одделение во болницата во Гостивар е едно од трите во земјава со посебна просторија за изолација за следење на евентуален сомнителен случај на корона.

error: Content is protected !!