Во Тетово и Гостивар приведени 7 лица за прекршување на полициски час

Од вчеравечер започна да важи забраната за движење во периодот од 21 часот навечер до 6 часот наутро. Полицијата има засилени контроли и дополнителни пунктови. Генерална оценка е дека забраната се почитува, но регистрирани се и прекршувања.

На тетовско-гостиварското подрачје евидентирани биле вкупно 7 прекршувања на полицискиот час, во Гостивар 2, а во Тетово 5.

„Констатирани се две прекршувања, лицата биле лишени од слобода, поради непочитување на воведената забрана за движење. Против нив поднесени се соодветни кривични пријави, истите се предадени за натамошна постапка во основното јавно обвинителство.“ информираше заменик командирот на Полициската станица Гостивар, Војче Смилески.

Покрај редовните патролни служби, во текот на полицискиот час, ПС Гостивар има поставено 7 пункта на територијата што ја покрива. На пунктовите има по двајца униформирани полицајци и еден од Надворешната канцеларија на ПС. Освен овие, има 24 часовен пункт на магистралниот пат Гостивар-Кичево, на раскрсницата за Дебар.

Дежурни пунктови има и на тетовското подрачје.

Полицискиот час не ги опфаќа важи за припадниците на МВР, Армијата, Противпожарните служби и лицата вработени во Комуналната хигиена кои работат во смена. Од забраната, исто така се исклучуваат лица кои имаат потреба од итна медицинска помош, кои се во животозагрозувачка состојба и оние кои одат на дијализа. При тоа, тие можат да бидат во придружба на најмногу уште двајца.

Во тетовско-гостиварскиот регион над 500 лица имаат потпишано изјави за самоизолација.

Powered by Live Score & Live Score App