Горан од Гостивар, преживеан патник во кобниот автобус: „Да не заборавиме и да извлечеме поука“

Горан Наумовски од Гостивар е еден од патниците кои ја преживејаа трагичната несреќа со автобусот на Дурмо Турс. Присеќавајќи се на страшниот настан од ланскиот 13 февруари,гостиварецот вели дека по првиот удар што го почувствувале, не мислел дека нешто толку лошо ќе се случи. Но, потоа уследил уште еден, па трет удар на автобусот….

„ Во првиот момент кога се слушна удирање во првата банкина,ние коишто бевме назад, не знаевме што се случи. Јас лично помислив дека сме удриле во некој автомобил на минување, и некако мислев дека се` ќе биде добро, но следуваше втор, па третиот удар во банкината од другата страна на автопатот. Потоа следуваа некои десетина секунди тишина, веројатно кога сме биле во воздух и потоа следуваше навистина страшен удар кој буквално не растресе сите. Тогаш веќе станав свесен дека се случува нешто многу лошо. Се обидов да станам и да излезам од автобусот, малку погледнав назад, глетката беше хорор, нешто страшно. Автобусот падна со потешкиот дел и моторот беше влезен внатре во самиот автобус. Успеав да излезам, а поради сите повреди што ги имав здобиено паднав на земја. Покрај мене имаше многу од патниците кои беа во лоша состоја. Потоа, некое време сум бил во несвест, а кога се присвестив собрав сила и видов околу себе многу луѓе кои молат за помош.“, ни раскажа Горан. 

Тој нагласи дека жителите на Ласкарци кои несебично притрчале на помош спречиле загубите да бидат уште поголеми:

„Благодарност до сите оние кои притрчаа така брзо жителите на Ласкарци постапија на еден човечен начин, на сите ни излегоа во пресрет. Може да гарантирам дека нивното навремено и брзо реагирање придонесе да нема уште поголем број на жртви, за што сите треба да им бидеме благодарни. Тие покажаа едно добро справување со такви ситуации каде пред се` треба да се биде човек, иако тоа и нив ги снајде како од небо паднато“.

Да учиме од грешките за да не ни се повторуваат несреќи со фатални последици, порача Горан.

„Не сакам да драматизирам, траумите остануваат, кај некого повеќе, кај некого помалку. Животот и покрај се` е убав. Но, не треба да заборавиме дека во несреќата беа загубени човечки животи, семејства останаа без своите најмили и едноставно да учиме од грешките, да не ни се случуваат истите работи во иднина.“

Powered by Live Score & Live Score App