Гостивар доби нова детска градинка

Ќе се скратат листите на чекање за прием во детските градинки во Гостивар. Денес официјално беше пуштена во употреба новата градинка во Долна Бањица. Предвидени се паралелки на турски, албански и македонски јазик, а објектот е со капацитет од 70-тина деца. Симболичната црвена лента на отворањето ја пресекоа министерката за труд и социјала Јагода Шахпаска и градоначалникот Арбен Таравари.

„Голема чест ми е што заедно со градоначалникот присуствуваме на отворањето на новата градинка во Гостивар. Огромно е задоволството, затоа што при отворањето на вакви објекти овозможуваме сместување на најмладите, на децата од претшколска возраст во организирани воспитно-сместувачки објекти коишто ќе овозможат градење на здрави, психо-емотивно способни капацитетни личности кои во текот на образованиот процес понатаму, ќе влезат подготвени“, нагласи Шахпаска.

Градоначалникот Таравари рече дека новите градинки во Гостивар се отвораат благодарение на добрата соработа со Министерството за труд и социјала.

„Да бидам искрен до крај, ние како опозициска општина единствено имаме добра соработка со Министерството за труд и социјална политика, со претходната министерка Мила Царовска, а се надеваме дека така ќе продолжиме и со новата министерка.“, изјави градоначалникот.

Министерката Шахпаска од Гостивар испрати порака дека доколку се почитуваат доследно протоколите, градинките ќе останат безбедни и заштитени од ковид зараза.

Новата градинка е сместена во објект на поранешното основно училиште во Долна Бањица. За адаптација, реконструкција и опремување биле потрошени околу 110 илјади евра, пари од министерството и општината.

error: Content is protected !!