Гостивар моментално со 264 активно заразени со коронавирус

Од почетокот на месец август гостиварскиот регион се наоѓа во највисоката фаза на ризик од ширење на коронавирусот. Заедно со Скопје, Штип и Куманово, Гостивар има широка распространетост на пренесување на заразата. Трендот на зголемување на заболени почна отккао беа укинати карантините и полицискиот час, а како главна причина надлежните го наведуваат непочитувањето на мерките на заштита.

Според статистиките на Министерството за здравство изминатите 5 дена, од понеделник до петок, потврдени се 59 новозаболени лица. Анализите на медицинските служби покажуваат дека повеќето од новите пациенти се со поблаги симптоми или се асимптоматски. Тие немаат потреба од хоспитализација и остануваат во двонеделна домашна изолација.

Порастот на позитивни во Гостивар е очекуван, со оглед дека тестови се прават на поголем број на граѓани, смета првиот човек на општината, повторувајќи го апелот да се почитуваат мерките.

„Нема што да се прави, состојбата со коронавирусот во државата нема контрола. Тоа што го поминаа другите градови пред нас, сега го поминува Гостивар. Имавме мирна ситуација, но сега бројките се поголеми, очекувано, со оглед дека повеќе луѓе се тестираат. Мојата препорака до сите граѓани останува: носете маска и држете дистанца. Ако внимаваме сите, помалку ќе се шири вирусот, ако не внимаваме, бројките ќе продолжат да растат.“, вели градоначалникот Арбен Таравари.

Охрабрува податокот што неделава на подрачјето на Гостивар има 121 оздравен пациент, што е двојно повеќе од бројот на новозаразени.

Од почетокот на пандемијата во гостиварскиот регион со коронавирус вкупно се дијагностицирани 623 лица. Моментално активно болни се 264.

error: Content is protected !!