Гостивар се вклучува во Европската недела на мобилност

Гостивар се приклучува кон одбележувањето на Европската недела на мобилност, чија цел е да се подигне свеста на граѓаните во борбата против аерозагадувањето – помалку да користат автомобили, а почесто велосипеди или да пешачат.

Активностите ги организира гостиварската локална самоуправа во соработка со здружението ГВ еко. Одбележувањето започна денес со симболична прошетка до Кејот на Вардар. Во деновите што следуваат ќе бидат промовирани патеки за велосипедистите, пешачка зона во централното подрачје, ќе има ден без автомобили и слично.

„Европската недела на мобилност ја одбележуваме под мотото „Гостивар без автомобили-пешачи или вози велосипед“. Сметаме дека е важно да се подигне свеста кај граѓаните, да почнеме да се бориме против аерозагадувањето и да се грижиме за нашето здравје, бидејќи навистина загадениот воздух е причина за многу болести. За жал, навиките се такви да се користи автомобил и за 500 метри. Тоа треба да се менува, за доброто на сите. Да се потрудиме да го направиме Гостивар еко град. Ги поканувам сите граѓани да ни се придружат во активностите“, изјави  Валентина Штерјоска од Гв еко.

Надлежните за екологија во Општина Гостивар нагласија дека борбата против загадувањето на воздухот е заедничка и секој треба да даде свој придонес.

Ден без автомобили ќе се организира на 22 септември, со промовирање на пешачка зона во центарот на градот и велосипедско дефиле низ градските улици. Еден ден претходно во Летниот амфитеатар ќе се одржи настан за презентација на еколошките програми и проекти.

Европската недела на мобилност во Гостивар се одбележува под мотото Град без автомобили – пешачи или вози велосипед

error: Content is protected !!