Дете почина во пожар во Гостивар

Трагичен настан го разбуди утрово Гостивар. Во голем пожар што се случи во стан на трети кат во зграда на ул „Кеј Вардар“, животот го загуби 7 годишно дете. Неговата 35 годишна мајка со повреди и во шок била пренесена во гостиварската болница, од каде по пружената лекарска помош била пуштена. Пожарот избувнал околу 8 часот во една од просториите во станот, каде под кирија живееле две женски лица со неколку деца. Огнот се разбеснил и брзо се проширил и во другите соби. Противпожарната служба стигнала набрзо по повикот и интервенирала со 2 возила и 10 пожарникари.

„Повикот го добивме во 8 и 5 минути и поради тоа што местото на настанот беше блиску, пристигнавме во 8 и10. Кога пристигнавме станот веќе гореше, а во опасност беа и околните објекти. Влеговме внатре да го извадиме детето, кое беше целото изгорено и почнавме да го локализираме пожарот. Го изгасивме во 9 и 20“, рече пожарникарот Изет Изети.

Обвинителството откри првични сознанија од лекарскиот тим, според кои детето за време на пожарот било врзано со ланец на нозете. Според исказот на семејството, причина за врзувањето било што детето било агресивно. Од обвинителството најавија дека ќе ги преземаат сите дејствија за утврдување на евентуална кривична одговорност.

Останатите станари од зградата испаничиле од огнената стихија и излегле од домовите, а пожарникарите успеале да спречат проширување на пожарот на околните станови.

Надлежните информираат дека е издадена наредба за обдукција на телото на починатото дете и се разговара со очевидците на настанот. По наредба на јавниот обвинител, се врши прибирање на трагите од лице место, кои треба да помогнат за прецизно утврдување на причините за настанатиот пожар.