Дневниот центар во Гостивар четири месеци работи под посебни протоколи

Дневниот центар за деца со посебни потреби во Гостивар, четири месеци функционира под посебни протоколи за заштита од коронавирус. Установата претходно имаше шестмесечна пауза во работењето поради пандемијата, а во октомври повторно ги отвори вратите за децата. Строгите правила налагаат да се работи со намален капацитет, пократок престој, ротации и слично.

„Моментално Центарот го посетуваат 6 дечиња и тие ротираат, со пауза, просториите се проветруваат, се врши дезинфекција и слично. Нормално, работиме според препораките се трудиме да ги заштитите корисниците, и ние самите да се заштитиме. Меѓутоа, тоа е многу тешко, бидејќи кај овие деца физичкиот контакт е многу важен, материјалите што ги имаме за работа, тоа се бара практична работа. На пример, тие не можат да носат маски, или да држат дистанца. Сепак, се трудиме целосно да одговориме на актуелната ситуација и до сега работата се одвива успешно. “ вели Арта Арифи Креци, психолог во Дневниот Центар.

Тимот од пет стручни лица во Дневниот центар максимално се труди околу исполнување на обврските од портоколите, за кои велат дека воопшто не се лесна работа, со оглед дека згрижуваат ранлива група деца. И покрај тоа, наоѓаат начини и до сега успеваат да одговорат на предизвиците.

Додека беше затворена установата, се правеа напори за спроведување на одредени програми онлајн како и советување на родителите. Психологот Арифи Креци вели дека сепак, за децата со посебни потреби престојот во центарот е незаменлив.

Дневниот центар за деца со посебни потреби во Гостивар постои од 2006-та година. Во нормални услови има капацитет за престој на 15-тина дечиња.

error: Content is protected !!