Донација компјутери за деца од социјален ризик во Гостивар

55 социјално загрозени семејства од подрачјето на Гостивар ќе добијат компјутери како донација, за да може децата да ја следат онлајн наставата. Гостиварска фирма одлучи да им излезе во пресрет на учениците кои немаат соодветна опрема за учење, во услови кога образовниот процес се одвива преку интернет.

Децата ќе ги добијат компјутерите целосно подготвени за користење.

„Се вклучуваме со донација на компјутери за да им олесниме и помогнеме на семејствата коишто не се во можност да обезбедат самите за своите деца.“, рече Кенан Садику од Нани Принт.

Листата на семејства кои ќе добијат компјутери е изготвена во соработка со општината и училиштата, врз основа на податоци за нивната социјална состојба. Доделувањето започнува од вчера и се очекува да се заврши за два дена.

Откако почна вонредната состојба поради короната, голем број компании и поединци во Гостивар обезбедуваат донации за ранливите категории граѓани. Најчесто тоа се пакети со храна и средства за хигиена. 

error: Content is protected !!