Донесени измени во буџетот и одлука за отпадот на седница на Советот на Гостивар

Претпоследната седница на Советот на Општина Гостивар за годинава отпочна со едноминутно молчење за починатите сограѓани од ковид. Претседателот на Советот, Бесим Мемеди побара на овој начин да им се искаже почит, како и сочувство до семејствата, нагласувајќи дека Гостивар последниот период е многу погоден од пандемијата.

Советниците на денешната седница изгласаа одлука за донесување на Планот за регионално управување со отпадот, кој се однесува на менаџирањето со депонијата Русино. Беше усвоена и прераспределба на пари во буџетот. Како што појаснија од Секторот за финансии измените се за искористување на вишок средства за капитални инвестиции и за обезбедување на плати за наставниците во основните училишта.

„Сумата што се префрла од дотациите за средните во основните училишта е 1,5 милиони денари. Во делот на измените за капитални инвестиции се работи за вкупен износ од околу 4 милиони денари.“, рече Садри Елези од Секторот за фиансии и буџет.

Од Секторот за финансии нагласија дека техничките подготовки за прераспределбата на парите потребни за платите на наставниците ќе се извршат итно, за да се избегне доцнење во исплатата. 

Следната седница на Советот на Општина Гостивар е закажана за 25 декември, кога треба да се расправа за буџетот за 2021-ва година.