Достава на храна во вонредна состојба

Мирно е по улиците во Тетово и тетовско за време на полицискиот час. Но, овие работници непречено си ги извршуваат своите обврски. Секој ден од 8 часот наутро до полноќ, вработените во ресторанот и пицерија „Ф.С. Куртиши“ одговараат на повиците од клиентите и доставуваат храна до нивните домови. И за време на вонредната состојба, овој угостителски објект им излегува во пресрет на граѓаните.

„Ние и пред состојбата со коронавирусот имавме бесплатна достава на храна до домовите на граѓаните. Работиме до полноќ секој ден и примаме нарачки. Доставуваме во целиот регион, за нас тоа не е проблем“, вели Агим Исмаили, вработен во „Ф.С. Куртиши“.

Тука за граѓаните се и момците од сендвичарата „Бургер Хаус“. Тие секојдневно доставуваат нарачки, но велат дека се чувствува намалената побарувачка.

„Намалена е побарувачката за 70 проценти, но ние продолжуваме напорно да работиме и да доставуваме храна. Работиме до 21 часот, постојано сме со соодветна заштита, а се обидуваме колку можеме и да им помогнеме на лицата кои не можат самите, во врска со достава на лекови“, истакнува вработениот од сендвичарата „Бургер Хаус“ во Тетово.

И покрај рестриктивните мерки, дел од угостителските објекти, се обидуваат преку достава да ги задоволат потребите на потрошувачите. Работат со соодветна заштита, почитувајќи ги мерките за спречување на ширењето на коронавирусот.