Д-р Исмаили од Гостивар се вакцинира против ковид во Словенија

Гинекологот Хатије Исмаили која потекнува од Гостивар, а минатата година доби високо признание за најдобар лекар во Словенија, прими вакцина против ковид 19. Имунизацијата во оваа земја започна кон крајот на декември лани, најпрво во домовите за стари лица и во болниците меѓу медицинскиот персонал. Докторката Хатије со нас сподели дека по вакцинирањето не и‘ се појавиле никакви несакани последици. Додека меѓу голем број граѓани постои дилема и скептицизам околу вакцините, таа немала сомнеж дали треба да се вакцинира, за да се заштити себе си и своите пациенти. „Верувам во науката. Очекувам вакцинацијата да биде светлина на крајот од тунелот на оваа пандемија“, вели гинекологот.

„Среќна сум што ја примив првата доза вакцина не се сомневам во ништо и немма никакви несакани ефекти. Секојдневно сум но контакт со пациенти, меѓу нив има и позитивни и на овој начин се заштитувам себе, моите блиски и моите пациенти, колеги. Прочитавме многу за развивањето на вакцината,, создадена од научници и имаме целосна доверба во науката.“, изјави Исмаили.

Словенечката влада усвои годишен план за вакцинација против Ковид-19, со кој се предвидува до август месец да бидат вакцинирани 1,6 милиони луѓе или 60 проценти од населението. До сега, прва доза од вакцината примиле над 20.000 лица, а имунизаицјата се одвида со вакцини од производителот „Фајзер/БионТек“. Тамошните власти најавија дека  наскоро ќе бидат достапни и вакцини од други компании, вклучувајќи ја и вакцината на „Астра Зенека“.

Инаку, д-р Хатије Исмаили завршила средно образование во гостиварската гимназија, а потоа продолжила да се образува на медицинскиот факултет во Ријека, Хрватска. По завршување на студиите се преселила во Словенија, каде денес работи и живее со своето семејство.

За најдобар лекар во Словенија беше избрана со гласање на граѓаните пациенти. Исмаили освои најмногу гласови во својата област-гинекологијата, но и вкупно од сите кандидати медицинари во земјата.