Закоп на починати од Ковид и во семејна гробница

Надминат е проблемот со кој се оспоруваше правото на семејствата од Тетово и од Гостивар, кои што имаат починато лице од ковид 19 да извршат закоп на истото во семејните гробници.

Починатите од Ковид 19 од Тетово досега се погребуваа само на православните гробишта во село Фалише. Наместо во семејната гробница на градските гробишта, семејствата беа принудени закопот на своите блиски да го извршат во ново гробно место. Таква одлука не е донесена ниту од локалната, ниту од централната власт, туку според проценки на Јавното комунално претпријатие и оператори кои вршат погребални услуги.

По реакции и дописи од граѓаните, директорот на Комисијата за односи со верските заедници и религиозни групи, Даријан Сотировски, оствари средба со претставници на сите засегнати институции, по што истакна дека отсега закопот на починато лице од ковид ќе може да се изврши по избор на семејството.

Сотировски добил исти реакции и од граѓаните на Гостивар. Иако на денешната средба немало претставник од гостиварското комунално претпријатие, тој смета дека и таму ќе се надминат постоечките состојби.  

Инаку, од Јавното претпријатие „Комуналец“ од Гостивар, пак, велат дека погреби на лица починати од ковид 19 се извршувале и во семејините гробници на православните гробишта, според донесените протоколи. 

error: Content is protected !!