Зачестени пожари на гостиварското подрачје

Зачестија пожарите на гостиварското подрачје. Во викендов што измина беа регистрирани неколку пожари во објекти, а гореше и во шумски предели. За среќа, пожарите поминаа без повредени, но предизвикани се значителни материјални штети. Причина за пожарите најчесто е човечкото невнимание, посочуваат надлежните. СВР Тетово апелира на зголемена внимателност за да се избегнат посериозни последици.

„Да не се оставаат вклучени грејните тела кога подолго време не се присутни во домовите или работните простории, особено не греалки, клима уреди или печки на дрва. Зашто, доволна е само мала искра да пламне голем пожар со сериозни материјални и други последици. Ова, посебно се однесува на станбените згради, каде далеку потешко се локализираат пожарите, поради недостиг на потребната опрема во многу од нив и отежнатиот пристап до објектите, најчесто од градежни или други причини“, нагласува портпаролот на СВР Марјан Јосифовски.

На отворено викендов пожари имаше над селото Дебреше, како и во повисоките предели на Шар Планина, кој најверојатно се проширил од намерно потпалена тревна површина.

„Секторот за внатрешни работи Тетово ги потсетува граѓаните дека предизвикувањето пожар, односно на општа опасност претставува кривично дело за кое е предвидена затворска казна од една до пет години“, вели портпаролот.

Викендов Противпожарната единица интервенираше на гаснење пожарво куќа на ул.„Драге Тодороски“, во Гостивар каде целосно изгорел подпокривот, како и во помошен објект во селото Врбен.

error: Content is protected !!