Зачестени физички напади меѓу ученици во Гостивар

Насилството меѓу младите во Гостивар станува зачестена појава. Тепачки и физички напади меѓу средношколци, па и меѓу основци се случуваат во близина на училиштата. Наместо дружба и делење на знаења и искуства, децата разменуваат тупаници. Минатата недела во само еден ден, полицијата регистрираше два случаи на физички напади меѓу ученици. Во едниот биле користени и тврди предмети.

Што ги прави децата агресивни? Според стручните лица причините првенствено се во  родителите и влијанието на интернетот.

„Причината прво треба да се бара во семејните вредности и начинот на којшто се воспитуваат децата. Телефоните и интернетот внесуваат голема промена во процесот на воспитување. На родителите им е најлесно, да им купат телефон на децата и да ги остават да го користат цело време. Така, децата изгледаа навидум мирни. Но, тие не се исполнети со некоја активност, па да ја извадат таа енергија што ја имаат низ нормална детска, младешка игра. Родителите пак, немаат никаков авторитет, владее тренд дека родителот треба да биде попустлив, треба да удоволува се` и децата многу се препуштаат на технологијата.“, вели Билен Карахасан, психолог во Центарот за социјална работа во Гостивар.

Ваквите проблеми невозможно е да се решаваат строго институционално, во училиштата или со полицијата, нагласува психологот Карахасан.

„Родителите не треба да мислат дека ако на детето му купат се` што ќе посака, скапи патики, телефони и слично, дека со тоа воспоставиле добра комуникација и релација. Не, потребен е разговор, внимание и време поминато во добра семејна атмосфера. Потребно е враќање на традиционалните семејни вредности, кога постарите се почитуваа и нивните совети беа слушани“, вели психологот.

Како превентивна мерка против меѓуврсничкото насилство и другите проблеми што ги мачат учениците, во средните училишта во Гостивар започнаа да се одржуваат редовни посебни состаноци. Средбите се организираат еднаш неделно, а во дискусиите учествуваат  претставници од полицијата, социјалните служби, локалната самоуправа, родители и самите средношколци. 

error: Content is protected !!