Изградбата на катна гаража во Гостивар ќе отпочне напролет

Недостигот од паркинг простор е горлив проблем во сообраќајот во Гостивар. Постоечките околу 840 паркинг места не ги задоволуваат потребите на граѓаните кои секојдневно користат автомобили за движење низ градот. Затоа честопати возачите се приморани да кружат по улиците во потрага по слободно место за да го остават автомобилот.

Изградбата на катна гаража е начин да се реши или во најмала рака битно да се ублажи оваа состојба. Општинското раководство во повеќе наврати најавуваше ваков проект по моделот на јавно-приватно партнерство. Првиот човек на општина Гостивар вели дека не се откажале од намерата да градат катна гаража и дека подготвителните работи веќе се прават.

„Рековме дека ќе градиме катна гаража за време на нашиот мандат и така ќе биде. Физибилити веќе се прави и планирано е со изградба да се започне некаде следната пролет. Се надевам дека до наесен ќе ја имаме готова и функционална првата катна гаража“, изјави гардоначалникот Арбен Таравари.

Воведувањето пак на јавен транспорт би имало големо значење не само за средување на хаосот во сообраќајот, туку и за намалување на аеро загадувањето. Но, до сега ниту една транспортна компанија не пројавила интерес за организиран превоз на патници низ градот и градските населби.

„Сум имал средби со повеќе компании што вршат транспорт, за жал не пројавиле интерес за јавен превоз. Ете, ова нека биде еден апел, повик до тие што се заинтересирани да се јават и да го спроведеме овој проект’, рече Таравари.

За Гостивар може да се каже дека е град на автомобили и граѓаните имаат навика да седнат зад волан и за многу кратки релации. Најголемиот сообраќаен метеж се создава во централното градско подрачје, кај тесното грло на бул „Браќа Ѓиноски“ и улицата која води кон општата болница.

error: Content is protected !!