Интензивни полициски акции во Гостивар за поголем ред во паркирањето

Недостасува поголема сообраќајна дисциплина кај возачите во Гостивар. Дека голем дел не ги почитуваат правилата и просписите, особено во делот на паркирањето, се покажува и преку резултатите од полициските акции. Во февруари во просек дневно биле откриени по 12 возачи кои погрешно ги паркирале автомобилите. Ги оставале на тротоари, во двојни редови, на раскрсници. Активна била и пајак службата на претпријатието за паркинзи, која за неполни две недели, подигнала 60 возила. 

„Од први февруари заклучно со денес изречени се над 150 мерки кои се однесувале на непрописно односно погрешно паркирање, претежно во таканаречени двојни редови, косо паркирање и паркирање во зона на крстосници, како и на пешачки премини и други недозволени места. Полициските службеници на Одделението за внатрешни работи Гостивар, во координација со локалната самоуправа, односно со нејзината „пајак-служба“, во овој период вкупно подигнале и транспортирале 60 непрописно паркирани возила, кои го попречувале нормалното движење на другите учесници во сообраќајот, најмногу на улиците „Браќа Ѓиновски“ и „Гоце Делчев“.“, вели портпаролот на СВР, Марјан Јосифоски.

Од СВР најавуваат дека активностите за поголем ред со паркирањето во Гостивар, со зголемен интензитет ќе продолжат и во наредниот период. Планирано е да бидат опфатени и улиците „Илинденска“ и „Живко Брајковски“.

На сите возачи кои непрописно ги паркирале им биле изготвени соодветни пријави, а зависно од видот и карактерот на прекшрокот казните се движат од 45 до 180 евра.

error: Content is protected !!