Истакнување на ромското знаме и хуманитарни активности за Денот на Ромите во Гостивар

Меѓународниот Ден на Ромите, 8 април во Гостивар годинава се одбележа со подигнување на ромското знаме на јарболот пред општината и со доделување на хуманитарна помош на ромски семејства кои се во социјална криза.

Поради вонредната состојба со коронавирусот изостанаа вообичаените прослави и манифестации за ромскиот празник.

„Овој 8 април за жал не е како изминатите седум години кога го славевме во добра атмосфера и со сите традици за нас Ромите. Оваа година поради невидливиот непријател коронавирус, најдовме решение кое е прилагодено на условите и ситуацијата во која се наоѓаме. Сакам да ве информирам дека дел од средствата кои беа предвидени за прослава на Денот на Ромите, во соработка со Црвен крст се пренаменуваат за помош на социјални семејства Роми, кои во ова време тешко се снаоѓаат со основни намирници. Сакам да им порачам на сите Роми, да останат присебни и да ги почитуваат мерките донесени од државата. Само господ знае како сето ова ќе заврши, затоа сите ние да си подадеме рака д апомине ова што побезболно.“ изјави Кашмир Салиу, советник на ДСР во Советот на Општина Гостивар

Ромското знаме од денес е истакнато и во големата општинска сала, заедно со останатите. Тоа е одраз на мултиетничноста и меѓусебната почит кои владеат во Гостивар, беше речено при поставувањето на знамето.

„Гостивар е мултиетнички град и добро се знае дека етникумите тука се почитуваат. Поради пандемијата, годинава го одбележуваме 8 април на поинаков начин. Сакам на сите Роми во Гостивар, во целата земја и низ светот да им го честитам празникот и да им посакам да го славата уште долго’, изјави градоначалникот Арбен Таравари.

8 април е прогласен за Меѓународен ден на Ромите во 1990 година на Светскиот конгрес на Меѓународната унија за Ромите во Полска.

error: Content is protected !!