Истече домашната изолација за 11-те лица во Гостивар – немаат симптоми, не се ризик

Никој од единаесетте лица од Гостивар кои беа ставени во домашна изолација по доаѓање од Италија, не развил симптоми на коронавирус и тие се ослободени од мерката.

„Лицата го поминаа периодот на инкубација од 14 дена, без да покажат симптоми и според тоа не претставуваат ризик ни за домашните, ни за другите околу нив и домашната изолација се укинува. Со оглед дека немаат симптоми, нема да бидат тестирани“, информираат лекарите.

Во текот на вчерашниот ден на гостиварското подрачје имало еден сомнителен пациент за корона, но тестирањето покажало дека е негативен на вирусот.

Во меѓувреме и здравствените установи и институциите постојано повикуваат граѓаните да ги почитуваат препораките и советите за превенција. Да се одржува високо ниво на хигиена, да се избегнува групирање, сите кои доаѓаат од ризичните земји да се самоизолираат две недели.

Владата воведе поригорозни мерки во насока на спречување на ширење на коронавирус.

Забранети се сите јавни и приватни собири, без разлика на обемот и бројката на учесници – концерти, театри, кина, спортски сали, теретани. Кафетериите и рестораните треба да работат со скратено работно време до 18 часот и со преполовен капацитет. Здравствените установи да ги откажат сите интервенции и прегледи, освен итните и неодложни.

error: Content is protected !!