Коронакризата не влијаела врз наталитетот во Гостивар

Ковид пандемијата до сега немала влијание врз наталитетот во Гостивар. Иако на гинеколошко-акушерското одделение во гостиварската болница се родиле 20-тина бебиња помалку во однос на лани, лекарите тоа не го поврзуваат со коронакризата. Објаснуваат дека трендот на намалување на бројот на новороденчиња трае веќе една деценија. Според податоците од одделението, во текот на минатата година биле родени вкупно 622 бебиња.   Од почетокот на годинава до сега, има 557 новородени.

„Споредено со лани истиот период имаме 20 раѓања помалку, но тоа не би го поврзале со коорнакризата. Секоја година отприлика за толку се намалува бројот на новородени во нашата болница, тоа е тренд што трае последната деценија“, рече раководителот на гинеколошко-акушерското одделение во гостиварската болница, д-р Агим Јакупи.

Според последните податоци од Државниот завод за статистика, во трите општини од гостиварскиот регион има негативен природен прираст на населението, односно повеќе починати од новородени.

Во месеците јули, август и септември на подрачјето на Општина Гостивар се родиле 171 бебе, додека починале 225 лица. Во Општина Врапчиште се регистрирани 70 новороденчиња, а 76 лица починале. На територијата на Маврово-Ростуше се родиле 12 бебиња, починале 23 лица.

На државно ниво, според анализите на Државниот завод за статистика, бројот на живородени деца во третото тримесечје од годинава, во споредба со истиот период од претходната година, е намален за 5.2 %. Бројот на умрените пак бележи зголемување од 15.3 % во споредба со истото тримесечје од 2019 година.