Кошаркарското првенство дефинитивно прекинато

Управниот одбор на Кошаркарската федерација на Македонија, денес донесе одлука и дефинитивно да го прекине првенството. Според одлуката, оваа сезона нема да биде прогласен шампион на Македонија, а нема да има ниту испаѓање од лигата. Наредната сезона првата лига ќе биде зголемена за две нови екипи и ќе брои вкупно 12 екипи. Во одлуката не е прецизирано на кој начин ќе се пополни првенството. Дали двете најдобри екипи во моментот на прекинот ќе бидат нови прволигаши или дополнително ќе има некој вид на разигрување за второлигашите останува да видиме во следниот период.

Во моментот на прекинот на првата позиција беше екипата на МЗТ Скопје, додека Гостивар и Работнички беа на второто и третото место.

На оваа одлука на Управниот одбор претходеше гласање на клубовите како да се постапи во оваа ситуација, а поголем од клубовите беа за прекин на шампионатот без да се прогласи шампион. На ова жестоко реагираа од МЗТ Скопје, кои сметаа дека треба да бидат прогласени за шампиони, иако беа одиграни само 17 кола од регуларниот дел, а до крајот освен последното коло од регуларниот дел требаше да се одиграат и 10 кола од супер лигата, како и полу финалето и финалето од плеј-офот.

error: Content is protected !!