Лекарите во Гостивар апелираат граѓаните навреме да бараат медицинска помош

Медицинарите во Гостивар имаат полни раце работа, откако периодов се влоши состојбата со коронавирусот на подрачјето. Бројот на активно болни надмина 210, а епидемиолошката служба постојано детектира нови случаи. Според податоците оттаму, денес се потврдени 19 новозаразени. Од нив, 14 во Општина Гостивар и 5 во Општина Врапчиште.

Алармантноста на ситуацијата ја потврдуваат и од Итната медицинска помош на гостиварскиот Здравствен дом, каде бележат се повеќе пациенти со симптоми на ковид. Сепак, лекарите потенцираат дека граѓаните честопати се обидуваат сами да се лечат дома, а медицинска помош бараат дури откако тегобите ќе станат сериозни и загрозувачки.  

„Она што загрижува е што има пациенти кои се кријат, се обидуваат сами да се лекуваат дома, а помош бараат дури кога многу ќе им се влоши состојбата. Би апелирала да не се прави тоа, не треба да се плашат или да се срамуваат да се обратат на матичните лекари кога ќе добијат некои симптоми. Се случува да затекнеме пациенти за кои после се утврдува дека имаат ковид, а тие со денови сами се лекувале дома без консултација со лекар. “, вели д-р Фларуше Османи, раководител на Итната медицинска служва во Гостивар.

Лекарите забележуваат и промена на симптомите кај пациентите.  Освен тешкотии во дишењето и висока температура во последно време се јавуваат и стомачни проблеми. Сите кои се сомнителни на ковид, се упатуваат на тестирање.

Гостивар, според класифицирањето на ризикот веќе се наоѓа во фаза 3, на локализирана трансмисија на вирусот, за разлика до скоро кога беше во втора фаза, со спорадични случаи.