Мртовечки сандаци завршија на депонијата Русино, полицијата истражува

Фрлени мртовечки сандаци на Русино, ги растревожија и вознемирија гостиварци. Сандаците завршиле на депонијата вчера, по што на социјалните мрежи беа објавени видеа и фотографии. Во јавноста се отворија прашања, од каде ковчезите се нашле на Русино, кој и зошто ги фрлил. Дополнителна паника создаде фактот што сандаците се со лимен дел, какви според протокол се користат за погребување на починати од ковид. Со исти такви, се пренесуваат мртовци од странство. Полицијата истражува, и за сега нема конкретни одговори околу случајот.

Од јавното претпријатие Комуналец велат дека сандаците вчера наутро ги собрале од дива депонија кај гробиштата во населбата Млаки. Тоа го направиле по реакција на граѓани.

„Нашите ингеренции како претпријатие се одржување на гробиштата и обезбедување на гробно место, други надлежности немаме. Услугите за погребување ги прави економски оператор, што е ангажиран. За овој случај, по реакции на граѓани дека неколку сандаци се фрлени на гробиштата, вчера се организиравме, ги собравме и ги однесовме на Русино, каде што им е местото.“, изјави Исак Лазами, директор на ЈП „Комуналец“ – Гостивар.

Од ИВЗ соопштија дека починатите од ковид се погребуваат според протоколи. Ковчезите не се отвораат и сите религиозни обреди се извршуваат откако сандаците ќе бидат веќе спуштени во земјата.

Директорот на Комуналец вели дека погребувањето на мртвите со корона е под надзор на надлежни комисии.

Од СВР Тетово соопштија дека преземаат мерки за откривање-кој и зошто ги оставил сандаците. Ќе се утврдува дали постојат основи на сомнение за сторени кривични дела, односно дали има елементи на непостапување по прописи во време на епидемија или на ширење на заразна болест.

Полициските службеници кои биле испратени по сознанија за фрлени мртовечки сандаци, не нашле погребална опрема на посочените места. 

Екипата на ТВ Кис/Менада на Русино ги снимаше ковчезите. Некои веќе до половина затрупани со земја, некои искршени на делови.

error: Content is protected !!