Обезбедена храна и облека за семејствата што живеат во шатори кај гостиварска патарина

Зрак надеж и светлина во црното секојдневие за трите ромски семејства, кои со мали дечиња живеат во субстандардни услови покрај гостиварската патарина. Хуманитарната  организацијата DAVA од Гостивар пружи рака да им помогне. Претседателот на организацијата Муса Хусеин ги посети семејствата во нивните импровизирани живеалишта и ги слушна маките и сиромаштијата со која се соочуваат. DAVA ќе обезбеди топол оброк секој ден за сите, облека за дечињата, а ќе ги помогне и со кревети, ќебиња и слично.

„Откако беше објавена сторијата, ги посетивме семејствата и видовме дека состојбата им е навистина тешка. Ќе направиме се што можеме да помогнеме, со божја волја. Таму живеат 15 лица, за кои секојдневно ќе носиме храна, додека за децата ќе обезбедиме и топла облека. Исто така ќе однесеме и кревет, теписи и други работи за кои увидовме дека се неопходни. Нема да оставиме без помош ниту едно семејство во Гостивар и низ селата, кои немаат никакви основни услови за живот.“, рече Хусеин.

Пред неколку дена екипата на Тв Кис и Менада ја објави сторијата за мизерниот живот на овие семејства. Живеат во шатори направени од најлон, среде кал, во влага и бедотија, честопати со празни стомаци. Ниту едно од дечињата, не оди на училиште. Далеку од безгрижната детска игра, нивното секојдневие се гладот, студенилото, сиромаштијата….

 DAVA е хуманитарна организација која секојдневно обезбедува топли оброци за околу 250 семејства во Гостивар и околината. Исто така, згрижува и бездомници и жртви на насилство.