Одлуката за катни гаражи во Гостивар пред општинскиот Совет

Општина Гостивар ја започнува постапката за доделување на договор за јавно-приватно партнерство за проектирање, изградба и управување на катни гаражи. Предвидено е да бидат изградени три, со што ќе се зголеми капацитетот на паркинг просторот во градот и ќе се намали сообраќајниот метеж. Предлог-одлуката за старт на процедурите ќе се најде пред гостиварскиот Совет на седницата закажана за утре. Локалната власт очекува да биде прифатена од советниците, по што ќе се прејде на изработка на тендерската документација за гаражите.

„Тоа беше наше ветување кое го исполнуваме, процедурата почнува, Советот ќе ја усвои одлуката“, вели градоначалникот Арбен Таравари.

Одлуката предвидува градоначалникот да формира комисија за спроведување на постапката за доделување на договор, составена од претседател и најмалку 4 члена и нивни заменици од редовите на општинската администрација и надворешни експерти. Комисијата е должна да изготви тендерска документација, вклучувајќи го и нацрт договорот и јавниот оглас. Колку долго ќе траат процедурите и кога ќе започнат работите на терен општинарите во овој момент не можат да кажат со прецизност.

Недостатокот на паркинг простор е долгогодишен проблем во Гостивар, кој им создава нервози и маки и на возачите и на сообраќајната полиција. Моменталните 840 паркинг места не ги задоволуваат потребите.

Leave a Reply

Your email address will not be published. Required fields are marked *