Од новите „замрзнати“ цени на овошје и зеленчук не се задоволни ниту продавачите, ниту купувачите

Од новите „замрзнати“ цени на овошје и зеленчук не се задоволни ниту продавачите, ниту купувачите. На тетовскиот зелен пазар продавачите велат дека не им се исплати, затоа што набавните цени се високи, додека за купувачите сѐ е скапо.

На Зелениот пазар во Тетово нема истакнато цени на овошјето и зеленчукот кои се „замрзнати“ со владина одлука. Продавачите револтирани, не сакајќи да збруваат пред камера, велат дека имаат големи загуби. Еден од нив рече дека доматот по набавна цена денес бил 120 денари, па тој немаше за продажба на неговата тезга затоа што, како што рече, треба да го продава под 100 денари. Кај останатите цените беа различни.

И купувачите незадоволни, велат дека во изминатиов перид сите цени се покачија и дека во оваа безпарица со која се соочуваат сѐ им е скапо.

Според вчерашната Одлука на Владата највисоката цена на килограм свежи домати се покачува од досегашните 70 на 95 денари. Максималната цена на краставиците се зголеми од 75 на 95 денари, а на кромидот од досегашните 60 на 70 денари. Замрзнатата цена на пиперките е 100, а на гравот 95 денари, додека цената на леќата останува иста – 110 денари за килограм. Кај овошјето сите замрзнати цени се покачуваат за по пет денари. Највисоката цена на бананите е 75 денари, портокалите до 60 денари, мандарините најмногу можат да чинат 65 денари, а лимоните 60 денари за килограм. Кај карфиолот се укинува ограничувањето на највисоката цена.

Одлуката трае до крајот на месецот.

Данијела Билбилоска