Пандемијата ги натера гостиварци повеќе да се грижат за здравјето

Медицината докажала дека во борбата против вирусите и последиците кои ги предизвикуваат, најважен е имунитетот на организмот. Откако почна ковид пандемијата, лекарите ги советуваат граѓаните да работат на подобрување на својот одбранбен систем. Така, полесно ќе се справат со заразата, доколку дојдат во допир со неа.

Короната ги натера и гостиварци да водат поголема грижа за своето здравје и да делуваат превентивно. Во аптеките во Гостивар има зголемена побарувачка за витамини и препарати за зајакнување на имунитетот. На граѓаните им стана навика да ги купуваат, што не било случај порано, велат  фармацевтите.

„Доста повеќе се бараат витамини, имуностимуланси. Може да кажеме дека порасна свеста на граѓаните дека треба повеќе да обрнат внимание на своето здравје. Купуваат и заштитни маски.“, рече Алберт Селими, фармацевт.

Освен во аптеките, по извори на зајакнување на имунитетот гостиварци често свраќаат и до зелените тезги. Продавачите велат граѓаните периодов редовно купуваат поголеми количини овошје и зеленчук, особено лимони, за кои се знае дека содржат многу витамин ц.

Регионот на Гостивар од почетокот на месецов често е меѓу првите во Македонија по дневната бројка на новозаразени со коронавирус. Причината за тоа надлежните ја лоцираа во непочитувањето на мерките и препораките за заштита.

Според податоците од Институтот за јавно здравје, неделниот биланс подрачјето го заокружи со 86 нови случаи.

Моментално бројот на активно болни се движи 240, од кои близу 200 се од Општина Гостивар, помал дел од Општина Врапчиште и само неколку во Маврово и Ростуше.