Пациенти со ковид во Гостивар се примаат и во модуларната болница

Почна хоспитализација на заболени со ковид и во модуларната болница во Гостивар. Деновиве има наплив на болни кои имаат потреба од болничко лекување, поради што во саботата беа примени првите пациенти во монтажниот ковид центар. Моментално таму се згрижени 8 лица, додека на инфективното одделение 22. Во третманот на пациентите во модуларната болница, се вклучуваат и специјализати, со оглед дека Гостивар има само двајца инфектолози.

„На инфективното одделение се лекуваат 19 пациенти со средно-тешка клиничка слика и 3 со потешка. Во модуларната болница хоспитализирани се 8 пациенти со релативно полесна клиничка слика, што не се на кислородна поддршка. На инфективното одделение тројца пациенти се на постојана кислородна поддршка, а 3 добиваат повремено. За жал, утрово во 9 часот еден пациент почина“, информираше д-р Ратко Наумоски, раководител на инфективното одделение во Гостивар.

Состојбата со коронавирусот во гостиварско се влошува и станува загрижувачка, поради трендот на зголемување на потешко болни пациенти, како и раст на новозаразени.

Сите пациенти првично ќе ги прегледа инфектолог на инфективното одделение. Од таму, потоа ќе се распределуваат каде ќе продолжи лекувањето, според тежината на клиничката слика.

Бројот на активно заразени со коронавирус во регионот на Гостивар се искачи на 301.