Пајак службата со полни раце работа

Речиси секојдневно Пајак службата подигнува од пет до 10 возила. Бројката се зголемува во деновите кога се вршат акциски контроли во соработка со полицијата. Од Пајак службата велат и дека возачите често знаат да прават проблеми кога заради непрописно паркирање се санкционирани. Додаваат дека состојбата со паркирањето, во целиот град е хаотична.

„Да зборуваме реално секаде се паркираат лошо. Повеќе одиме превентивно на терен, но секаде е хаотично, особено кај болница, секогаш има нешто итно што треба да се преземе“, вели Реџеп Арифи од Пајак службата во Тетово.

Од Секторот за внатрешни работи Тетово, пак, информираат дека во наредниот период ќе ги засилат активностите поврзани со паркирањето и застанувањето на автобусите и такси-превозниците во Тетово.

Во рамките на тие активности полициските службеници ќе ги санкционираат сите оние кои нема да ги користат 40-те наменски стојалишта и свртувалишта, определени за таа цел од тетовската локална самоуправа.Ова, посебно се однесува на нерегистрираните, таканаречени „диви“ таксисти. СВР Тетово, исто така, ќе ги интензивира и другите активности кои го регулираат паркирањето во централното градско подрачје. Погрешно паркираните возила без исклучок ќе се санкционираат и подигнуваат од „пајак-службата“, пред се оние возила кои го попречуваат нормалното и безбедно движење на другите учесници во сообраќајот, посебно во близина на училишта и други јавни објекти.

error: Content is protected !!