Пензионерите си помагаат меѓусебно за време на вонредната состојба

Понеделник, среда и петок по два часа. На овој начин работи Здружението на пензионери во Тетово, во периодот додека трае вонредната состојба заради коронавирусот. Оваа група граѓани спаѓа во најранливите категории кои се изложени на поголеми ризици доколку заболат од Ковид-19. Претседателот на Здружението Селвер Мемети вели дека на пензионерите сега им е најпотребна помош, а пред се точни информации.

„Работиме само три дена во неделата по два часа. Имаме голем број на активисти кои помагаат и доставуваат храна или лекови за сите оние пензионери кои не можат самите да го сторат тоа или немаат помош од никого. Пензионерите се во ризичната категорија граѓани, кои се изложени на ризици доколку заболат од вирусот“, вели Мемети.

Мемети со апел до пензионерите.

„Апелирам до сите пензионери да се чуваат, да побараат помош ако им е потребна, да ни се обратат, да не излегуваат од дома беспотребно и да ги почитуваат препораките“, истакнува Мемети.

На самиот влез од Здружението се изложени сите информации кои на пензионерите им се потребни во овој период, како и телефонски број на кој може да се обратат доколку имаат некоја потреба.

error: Content is protected !!