Персонал од Итна помош во Гостивар во изолација – потврден коронавирус кај медицинска сестра

Потврден е коронавирус кај медицинска сестра од службата за Итна помош во Здравствениот дом во Гостивар. Ова е прв и во моментот единствен случај на заболено лице вработено во оваа здравствена установа. По направената епидемиолошка анкета, превентивно целата смена од 13 вработени, медицински и технички персонал е пратена во домашна изолација.

Директорот на Здравствениот дом, Јамин Синани вели дека биле преземени сите мерки и препораки за заштита, а заболената сестра е на домашно лекување.  

„Дирекцијата на Здравствен дом од почетокот на пандемијата ги има преземено сите мерки, како дезинфекција и опремување на персоналот со заштитна опрема. За случајот со инфицираната медицинска сестра направена е епидемиолошка анкета на целиот медицински и немедицински персонал кој бил на смена, тие се без симптоми и пратени во домашна изолација. Во меѓувреме извршена е целосна дезинфекција на сите простории. Медицинската сестра е во стабилна состојба и се наоѓа на домашно лекување.“, вели Синани.

Според директорот, службата ќе продолжи непречено да работи со прераспределување на останатиот персонал.

Министерството за здравство во изминатото деноноќие во гостиварскиот регион регистрира 1 новозаболен со ковид, 4 оздравени пациенти и еден смртен случај.

error: Content is protected !!