Посебна соба на инфективното одделение во Гостивар за сомнителни случаи на коронавирус

На инфективното одделение во гостиварската болница опремена е просторија за изолација на евентуални пациенти сомнителни на коронавирус. Во просторијата има три болнички кревети, заштитни маски, очила, капи, ракавици и мантили за една употреба, како и средства за дезинфекција.

Инфективното во Гостивар е едно од трите одделенија во земјава, покрај во Штип и Велес за кои министерот за здравство Венко Филипче информираше дека се определени за опсервирање и следење на сомнителни случаи, ако се јави потреба.

Директорот на болницата во Гостивар, д-р Јакуп Јакупи рече дека ја опремиле просторијата според препораките на Министерството, а обезбедиле и посебно амбулантно возило за транспорт на евентуални заболени.

„По препораките на Министерството за здравство ги презедовме сите неопходни мерки. Направивме изолација на една просторија на инфективното одделение, го снабдивме одделението со поголем број на стерилни маски, капи, мантили. Неодамна се снабдивме со уште едно амбулантно возило, кое е подготвено да се стави на располагање. Има и доволно количини на потребните средства за дезинфекција и за одделението, за персоналот, возилото. Се надеваме дека нема да има случаи со коронавирус, но ние сме подготвени и ги презедовме сите мерки“, изјави Јакупи.

Toj вели дека доколку дојде до згрижување на пациент сомнителен на корона, тогаш инфективното одделение ќе се затвори за останатите пациенти, односно тие ќе се пренасочат на другите одделенија.

Во земјава до сега не е регистриран случај на заболен од коронавирус. Здравствените власти ги зајакнаа мерките на превенција и формираа Кризен штаб во рамките на Министерството.

error: Content is protected !!