Постот и здравјето – чување на имунитетот во време на пандемија

Верниците во недела ќе го слават Христовото воскресение – Велигден. Голем дел од нив го практикуваат постењето – одрекувањето од млечни производи, производи од животинско потекло и јајца. Какво влијание има постењето врз здравјето на луѓето, објаснува специјалистот по семејна медицина, д-р Светлана Трифуновска.

„Преку постот се исфрла масната храна, јајцата, месото од исхраната. Добро би било ако луѓето сакаат да постат, постепено да се подготвуваат за такво нешто, односно да исфрлаат постепено одредени видови на храна пред постот за да можат да го навикнат организмот. Истото важи и по завршувањето на постот – без нагло менување на исхраната за да не дојде до шок на организмот, па да биде потребна и медицинска помош“, вели д-р Трифуновска.

Дали е препорачливо сите групи на верници да постат? Д-р Трифуновска вели дека на ризичните групи граѓани не им се советува постење. Особено во овој период кога владее пандемијата со коронавирусот и потребно е да се одржува имунитетот.

„Старите лица, лицата со хронични болести, трудниците и оние кои работат тешка физичка работа не се препорачува да постат. А и сите оние кои сакаат да постат а имаат некаква состојба, треба прво да се консултираат со својот матичен лекар“, истакнува Трифуновска.

Д-р Трифуновска и со порака до граѓаните, да одржуваат дистанца кога влегуваат во простории каде што има голема фреквенција на луѓе, редовно да мијат раце, да внесуваат доволно витамини и здрава храна и редовно да се консултираат со својот матичен лекар.

error: Content is protected !!