По затворањето на епидемиологија во Гостивар, тестирањето продолжува на привремен пункт

На гостиварското подрачје, до сега за присуство на Корона биле тестирани вкупно 97 лица. По затворањето на епидемиолошката и микробиолошката служба, откако еден вработен таму доби позитивен резултат, пуштен е во функција привремен пункт за земање на брисеви. Tој процес и натаму продолжува да се одвива непречено, информираше денес директорот на болницата Јакуп Јакупи.

„Обезбедено е алтернативно решение во просторија на поранешна дијализа. Тестирањето продолжува, само за илустрација, вчера иако беше неделен беа беа земени 15 брисеви“, рече Јакупи.

Во општата болница „Д-р Ферид Мурад“ во Гостивар се преземаат дополнителни засилени мерки за екипирање и заштита на медицинскиот персонал.

„Ги организиравме медицинските екипи да работат во смени, на начин да немаат контакти една група со друга, за да бидат заштитени самите, а со тоа и да нема никакви пречки во функционирањето на болницата, да може да се пружат максимално здравствените услуги на пациентите“, објасни директорот.

Јакупи упати апел до гаѓаните без неопходна потреба да не ја посетуваат болницата, за да не се изложуваат себе си, а и медицинскиот персонал на ризик.

error: Content is protected !!