Православниот свет го слави Божиќ три дена

Христос се роди-Навистина се роди. Ова е светиот поздрав за православните верници, со кој се поздравуваат и си го честитаат големиот христијански празник Божиќ. Христовото раѓање се чествува три дена, а денес вториот ден Божиќ е посветен на мајката божја и се одбележува како Собор на Пресвета Богородица.

Гостивар има тридецениска традиција на славење на Христовото раѓање, која не изостана и годинава со централна прослава, вчера наутро, но под протоколи. Верниците носеа маски, не се задржуваа во храмот долго време и изостана заедничката празнична трпеза. Со светата литургија чиноначалствуваше Митрополитот тетовско-гостиварски г.Јосиф, во сослужение со свештенослужителите од гостиварското архиерејско намесништво.

Пред верниците, архиерејскиот намесник на гостиварското намесништво Марјанчо Мадевски го пренесе божиќното послание на поглаварот на МПЦ г.г. Стефан во кое меѓу другото се вели.„Нека годината којашто доаѓа биде време на победа над злото и над непријателствата коишто владеат со светот, да биде време благопријатно за изобилни духовни плодови и време во кое ќе заврши страдањето од подмолната болест; нека биде и време на благодарност до здравствените работници, чија саможртва треба да биде за пример.“

Верниците кои присуствуваа на литургијата, со молитва за мир и спасение, запалија свеќи и оставаа дарови, а оние кои ги постеле шестнеделните пости се причестија. Граѓаните со кои поразговаравме, без исклучок рекоа дека најважното што го посакуваат е доброто здравје и да заврши пандемијата.

Утре, на третиот ден Божиќ се празнува Свети првомаченик Стефан, кој бил каменуван затоа што проповедал дека во Исус не веруваат само лошите луѓе.

error: Content is protected !!