Прес на градоначалникот Таравари за 3 години раководење

Со видео презентација на реализирани проекти и прес конференција, градоначалникот на Гостивар Арбен Таравари, направи пресек на тригодишното раководење со Општина Гостивар. „И покрај разните пречки од централната власт, и покрај тоа што 2020-та е година на пандемија, како општинско раководство не престанавме посветено да работиме во инвестиции и проекти со кои ги подобруваме условите за граѓаните. 70% од ветувањата во предизборната кампања се реализирани“, подвлече градоначалникот.

„Отворивме два стационари за кучиња скитници, пред да дојдеме на чело на општината немаше ниту еден, потоа четири нови градинки, а петтата е веќе во процедура, па 30 километри новоасфалтирани патишта во градот и во руралните средини, 20 километри водоводни линии, над 50 километри канализација, околу 500 илјади евра инвестиции во училиштата, иако ингеренциите ни беа одземани.“, изјави Таравари.

На новинарско прашање за критиките на гостиварскиот огранок на ДУИ, Таравари искоментира дека ДУИ се класичен пример на уништување на институциите, поради што последици трпат сите.

„ДУИ откако е на власт уништува се што може да се уништи. Еве „Пошта“ е класичен пример како ДУИ уништува едно претпријатие, го донесе до пропаст. Во Општина Гостивар утре да дојдат од „Мерцедес“ да инвестираат немаме да им понудиме локација, нема индустриска зона.“, рече тој.

За изборното ветување за катна гаража, која треба да го реши недостигот на паркинг простор во Гостивар,  Таравари рече дека физибитили студијата веќе се работи и се очекува дека од напролет ќе започне изградбата.

error: Content is protected !!