Продолжува да расте бројот на заразени со корона во Гостивар

Продолжува да расте бројот на новозаразени со коронавирус на гостиварското подрачје. Неделава, Гостивар во извештаите на Министерството за здравство секојдневно беше меѓу регионите со најмногу нови случаи. Од понеделник до петок вкупно се потврдени 52 новозаболени лица, додека 23 се регистрирани како оздравени. Истиот период, два пациенти позитивни на ковид починале. Активно болни се 220 граѓани, од кои над 70% се од територијата на Општина Гостивар.

Меѓуопштинскиот Кризен штаб за Гостивар, Врапчиште и Маврово Ростуше ја оценува состојбата како алармантна и сериозна. Особено проблем претставува што дел од граѓаните ги кријат симптомите и не се јавуваат на лекар навреме.

„Би апелирал граѓаните сериозно да ја сфатат ситуацијата и да се придржуваат до мерките. Исто така, еден апел да не ги кријат симптомите, туку да бараат лекарска помош навреме“, рече градоначалникот на Маврово Ростуше, Медат Куртовски.

Освен апел за почитување на препораките и поголема свест од граѓаните, надлежните за сега не преземаат, ниту предлагаат други дополнителни мерки за заштита. 

Заедно со зголемувањето на бројката на новодијагностицирани во Гостивар, во пораст е бројот на лица коишто се наоѓаат во задолжителна домашна изолација

Според статистиката на Секторот за внатрешни работи, за три дена Државниот здравствен и санитарен инспекторат издал решенија за изолација на 80-тина лица. Истиот период околу 140 граѓани добиле казни за неносење на заштитни маски.

error: Content is protected !!