Проект за згрижување на бездомници во Гостивар

Хуманитарните иницијативи се повеќе од добредојдени во пандемиското време кое го живееме. На сите ни треба зрак светлина и надеж во доброто, во човечноста. Тоа овојпат ни доаѓа од Гостивар, од хуманитарната организација Дава, која спроведува проект за згрижување на бездомници или лица кои поради семејни проблеми, насилство не можат да престојуваат дома.

„Изнајмивме два стана, посебно за машки и женски лица, со капацитет од вкупно 14 кревети. Бездомниците и секој кој има потреба од ваков вид на помош, како на пример, некој што трпи насилство дома, избркан од дома, може да ни се обрати и ние ќе го згрижиме. Ги покриваме сите трошоци, и за облека, храна и основни потреби. Во моментов имаме засолнето две лица, а во текот на наредните денови ќе згрижиме уште едно лице. Во иднина планираме да изградиме посебен објект за таа намена, како и поголема кујна, за подготовка на храна за загрозени граѓани“, изјави Муса Хусеин, претседател на организацијата.

Организацијата со својата народна кујна моментално обезбедува оброци за околу 250 сиромашни семејства на подрачјето на Гостивар. Помош може да добие секој на кого му е потребна, без оглед на националната или верска припадност.

Овие хуманитарци изминатиот период обезбедија и дрва за огрев за зимава за 60 сиромашни семејства. Оние кои имаат потреба од помош може да се обратат во Организацијата Дава на ул „Светозар Пепоски“ близу „Комуналец“.

error: Content is protected !!