Протестно дефиле во Гостивар за дислокација на депонијата Русино

Гостиварци го кренаа гласот против загадувањето од депонијата Русино. Граѓанската иницијатива „Стоп Русино-чист воздух за Гостивар“ вчера организираше протестно дефиле по градските улици, се до депонијата. Еко активистите порачаа дека горењето на отпадот итно треба да се спречи и побараа дислокација на Русино.

„Русино не е депонија. Русино е само место каде се складира секаков вид отпад. Русино постојано гори и ние се сомневаме дека отпадот се пали бидејќи по дваесет години користење, капацитетот е веќе исполнет. Состојбата е поразителна и еколошки недозволива и штетна за здравјето на гостиварци.“, рече Валентина Штерјоска од граѓанската иницијатива.

Русино е одредена како регионална депонија за Полог, а нејзиното стандардизирање треба да отпочне во рамки на проектот „Управување со цврст отпад во Полошкиот регион“  Менаџирањето со депонијата ќе го преземе регионално претпријатие. Но, процедурите се стопирани заради изборите.

„Процедурата е отпочната, општините треба да изберат свои претставници за во управниот и надзорниот одбор. Поради изборите сега законски не е дозволено да се именуваат лица во одбори, но веднаш штом завршат изборите ќе продолжи процедурата“, вели Славчо Костоски, одговорен во единицата за управување со проектот.

Додека се одолговлекуваат формалните процедури, отпадот на Русино речиси секојдневно гори, а чадот и миризбата се шират низ целиот град и околината. Депонијата останува еколошки проблем број еден за Гостивар.

Leave a Reply

Your email address will not be published. Required fields are marked *

error: Content is protected !!