Само 4 регистрирани случаи на грип сезонава во Гостивар

Грипот падна во сенка на коронавирусот. За разлика од претходните години, кога овој период грипот беше најчестата зараза меѓу граѓаните, годинава заболените може да се избројат на прсти. Според евиденцијата на епидемиолошката служба на подрачната единица на Центарот за јавно здравје во Гостивар, сезонава во регионот се потврдени само 4 случаи. Во јануари пак до сега, нема ниту еден. За споредба, годишно во Гостивар се регистрирале од 1.500 до 2.500 грипосани.

„Состојбата со сезонскиот грипот на подрачјето на гостиварскиот регион, за сега е мирна. За разлика од претходните години, бројките ни се неколкукратно пониски. Во сезоната на пријавување на грип, која почнува од 40-та недела претходната година до сега имаме само 4 поединечни пријави. Од почетокот на оваа година, пак немаме ниту една пријава на грип, ниту од матични лекари, ниту од инфективното одделение.“, изјави епидемиологот д-р Благородна Мишковска-Војновска.

Мерките против корона спречуваат и ширење на грип, велат лекарите. Со оглед дека двете инфекции се пренесуваат на ист начин, маските, забраните за собири, посебните протоколи за работа на училиштата и институциите, кои се антиковид мерки, даваат ефекти и за вирусот на грип.

Официјалните податоци од Институтот за јавно здравје покажуваат дека претходната сезона вкупниот број на заболени од грип во Македонија бил 33.171. На гостиварското подрачје биле евидентирани над 1.500 пациенти со грип. Смртни случаи од компликации на грип во земјава имало 3.

Од почетокот на ковид пандемијата, лани во март, на државно ниво потврдени се 90.717 заразени. Во регион на Гостивар оваа бројка изнесува 3.577. 

error: Content is protected !!