Седница Гостивар: ДУИ и Алијанса се контрираа за трошењето на јавните пари

Денешната седница на Советот на Општина Гостивар помина во знакот на контрирање меѓу опозициската ДУИ и Алијанса за Албанците, која го има советничкото мнозинство. Газменд Мемеди од Демократската унија за интеграција во дискусија за буџетските средства и поддршка на проекти, нагласи дека општината не работи домаќински, има злоупотреба на јавните пари и дека општинскиот долг расте.

„Кога стана градоначалник Арбен Таравари вети дека ќе го исплати долгот на општината, а сега сведоци сме дека не е така, долгот расте и стигна 3 милиони евра. Ние како опозициска советничка група, немаме моќ нешто да направиме освен да ја алармираме јавноста. Има злоупотреба на парите од буџетот, не се кажува каде и како се трошат.“, рече Мемеди.

Советничката од Алијанса, пак Њомза Шаќири реплицираше дека ваквите наводи се невистина, дека општината работи транспарентно, а парите се инвестираат во инфраструктурата.

Советничката од Алијанса, пак Њомза Шаќири реплицираше дека ваквите наводи се невистина, дека општината работи транспарентно, а парите се инвестираат во инфраструктурата.

„Сето тоа што го кажа советникот на ДУИ е неточно и е негативна пропаганда. Кога Алијанса ја презеде Општина Гостивар имаше 4 милиони евра долг. Од тие 2 милиони се исплатија од Министерство за финансии, а општината исплаќаше на рати останатото, тоа што имаше обврски. Општината зеде обврска да плаќа долг од 1 милион евра и на „Комуналец“ и нормално е дека така долгот ќе порасне. Нема никаква манипулација. Сите проекти што се реализираат се усвојуваат на Совет и тоа се видливи проекти, асфалтирани патишта од над 30 километри, изградена мрежа на канализација и водовод итн.“, изјави Шаќири.

Советот на Гостивар денес усвои ребеланс на буџетот, како и одлуки за доделување на субвенции на јавните претпријатија за паркинзи и зеленило и за стопанисување со спортски објекти.

Советниците ги изгласаа и претставниците на Гостивар во Управниот одбор на регионалното претпријатие за управување со отпадот во Полог „Русино“. Тоа се: Гајур Изаири, Дритон Саити и Насир Хасипи. Со ова се создаваат услови, новоформираното претпријатие да започне да функционира.

Од друга страна, се‘ уште не се собрани потписите од градоначалниците на сите полошки општини за ревидирање на Планот за управување со отпад, со што се предвидува да се најде нова локација за регионална депонија во период од 5 години. Договор за ревидирање беше постигнат пред околу еден месец, на заедничка средба на граѓанската иницијатива Стоп Русино, министерот за екологија Насер Нуредини и градоначалникот на Гостивар, Арбен Таравари.  Од иницијативата Стоп Русино сега очекуваат поголем ангажман од локалната власт и од советниците што поскоро да се обезбедат потписите, како гаранција дека Русино ќе биде затворено за 5 години.

error: Content is protected !!