Се одбележува Светскиот ден на учителот

Учителите се вторите родители на децата, нивни извор на знаење, разбирање и поддршка. Личности кои на најмалите им служат како пример, ги образуваат, воспитуваат, им помагаат секојдневно да растат и да се развиваат за здрав и успешен натамошен живот.

Денешниот датум, 5-ти Октомври се одбележува како Светски ден на учителите. По тој повод поразговаравме со Виолета Алигега Рамадани учителка во ОУ „Единство“ во Гостивар, која има повеќе од три децении работно искуство со дечиња. Кај оваа учителка не може да не се забележи ведрината, позитивната енергија и исполнетоста кога е во друштво на своите ученици.   

„Пак да се родам, пак би ја избрала професијата учителка. За да биде некој успешен учител, мора да ги сака децата, тие се најискрени, многу ранливи и мора да знаеш како да им допреш во душата. Кога ќе ја стекнеш нивната доверба, тоа е бесценето“, вели учителката.

Виолета годинава води одделение со првачиња. Предизвикот е двојно поголем. Освен вообичаеното запознавање, зближување и стекнување на довербата, тука е и ковид пандемијата. Децата и самиот наставен кадар се должни да почитуваат строги правила за заштита. Иако тоа не е лесно, сепак навиките се стекнуваат.

Алигега Рамадани потенцира дека успешен учител несомнено ќе биде оној што ги сака децата и има трпение за нив.

А една стара мудрост вели: “Просечниот учител кажува, добриот објаснува, подобриот демонстрира, а најдобриот учител инспирира”.

Среќен празник учители и наставници!

error: Content is protected !!